Á ársaðalfundinum, sum var í mai, varð samtykt at kalla inn til eykaaðalfund. Hesin verður  20. juni í ÍSF-húsinum kl. 18.00. Sama dag verður eisini limafundur, nevniliga kl. 19.00 – eisini í ÍSF-húsinum.

Kristian Johansen, formaður HSFs og Allan Skaalum, marknaðarleiðari hjá Atlantic Airways, taka í hondina á hvørjum øðrum eftir at nýggur samstarvssáttmáli varð undirskrivaður.

HSF og Atlantic Airways hava í nógv ár havt sera gott samstarv. Og hetta samstarvið fer at halda fram, tí í sambandi við ársaðalfundin hjá HSF leygardagin varð, nýggjur sáttmáli undirskrivaður. Hoyr Allan Skaalum greiða frá niðanfyri:

Á skránni var ársfrágreiðing, framløga av roknskapi, uppskot um viðtøkubroytingar og val av nevndarlimum. Margrið Weihe varð afturvald til næstforkvinnu. Í starvsnevndini vóru Sigvør Matras og Eydna Midjord Mikkelsen valdar. Sunneva Jakobsen, sum var í starvsnevndini tók ikki við afturvali. Sum eykalimir vóru Eiler Einarsson og Jákup Sverri Kass valdir. Á fundinum vóru 31 fólk úr 13 hondbóltsfeløgum og fundurin varð hildin á Hotel Føroyum.

Starvsnevndin hjá HSF sær nú soleiðis út:
Kristian Johansen, formaður
Margrið Weihe, næstforkvinna
Egill Steintórsson
Eydna Midjord Mikkelsen
Sigvør Matras

Sí ársfrágreiðingina her: Ársfrágreiðing HSFs 2013

Frágreiðing frá aðalfundinum verður løgd út á heimasíðuna í næstum.

[Show as slideshow]

[View with PicLens]

Mynd frá IHF venjaraskeiðinum apríl 2013

Tíðindaskriv frá HSF: Hondbóltssambandið sett venjaraútbúgving á stovn
HSF-venjaraútbúgvingin, sum hon verður nevnd, inniheldur tvey grundskeið og tvey valskeið og talan er um eina grundútbúgving, sum skal vera liðug á páskum 2014. Farið verið í gongd síðst í august og longu nú ber til at melda seg til.

Um grundgevingina til at seta venjaraútbúgvingina á stovn sigur HSF:
Í hondbóltsfeløgunum kring landið er stórt virksemi hvønn einasta dag. Sjálvsagt er tað venjingin, sum er í miðdeplinum og tey, sum bera hesa venjing eru eldsálir, foreldur og onnur og tað er eitt megnar arbeiði, sum verður gjørt. Felags fyri flestu av hesum er, at møguleikarnir at sleppa á skeið ella at fáa undirvísing í hondbóltsvenjing hava kanska ikki verið til staðar. Starvsnevnd HSFs hevur gjørt av at gera nakað við hetta og hevur – í samstarvi við venjararnar Kára Nielsen, Birgir Hansen og Dia Midjord – sett á stovn eina føroyska venjaraútbúgving: HSF venjaraútbúgvingin!

Føroysk loysn
HSF venjaraútbúgvingin er lagað til umstøðurnar í Føroyum, men hon tekur støði í venjaraútbúgvingini hjá danska hondbóltssambandinum og er eisini gjørd í samstarvi við DHF. Føroyska útbúgvingin byggir á, at tú skalt útvega tær ávíst stigatal fyri at sleppa víðari. Tú kanst útvega tær stig sum spælari, venjari ella við at taka venjaraskeiðini. Í alt skalt tú hava 50 stig fyri at koma víðari á test-skeið. Ætlanin er at skipa fyri fyrstu royndini á páskum 2014. Tey, sum klára royndina, fáa møguleikan at útbúgva seg víðari. Næsta stig í hesum sambandi er “Divisionstrænerkursus”, og sum frá líður verður møguleiki at taka hesi útbúgvingarskeið í Føroyum. Tað verður við bæði føroyskum og donskum vegleiðarum, tí DHF hevur bjóðað seg fram at standa fyri útbúgvingini.

Temakvøld fyri foreldrum og øðrum áhugaðum
At stuðla foreldrum og øðrum áhugaðum, sum fegin vilja hjálpa til rundan um hondbóltin, verður skipað fyri temakvøldum í feløgunum, sum roynd hondbóltsfólk fara at standa fyri. Endamálið er at geva luttakarunum nøkur amboð at arbeiða við, m.a. lærubøkur. Tað einasta feløgini skulu gera í hesum sambandi er at fáa fólk at møta, útvega høli og hava ein kaffimunn kláran. Avtalað verður gjørd við einstøku feløgini, nær temakvøld skulu vera – og málið er, at temakvøld hava verið í flestu feløgum áðrenn jól.

Farið verður í gongd í heyst
Byrjað verður við barna- og ungdómsvenjaraútbúgvingini, sum verður tikin í fýra pørtum: grundskeið 1, grundskeið 2, valskeið 1 og valskeið 2. Fyri at fáa bestu umstøður er landið býtt í trý øki:

• Eysturoy og Norðoyggjar
• Norðurstreymoy, Vágar og Sandoy
• Suðurstreymoy og Suðuroy

Tíðarætlanin er henda:
Ley. 14. sep: Grundskeið 1 fyri Norðurstreymoy, Vágar og Sandoy
Ley. 21. sep: Grundskeið 1 fyri Suðurstreymoy og Suðuroy
Ley. 05 okt: Grundskeið 1 fyri Eysturoy og Norðoyggjar
Ley. 19. okt: Grundskeið 2 fyri Eysturoy og Norðoyggjar
Ley. 02. nov: Grundskeið 2 fyri Norðurstreymoy, Vágar og Sandoy
Ley. 09. nov: Grundskeið 2 fyri Suðurstreymoy, Suðuroy

Tá ið nærkast, verður kunnað um innihaldið í skeiðunum. Nær valskeið 1-2 verða, verður ásett seinni – málið er, at allir fýra partarnir eru gjøgnumførdir áðrenn 1. apríl 2014, og at eini 50 luttakarar hava verið í gjøgnum.

Tilmelding
Við hesum verður heitt á hondbóltsfólk um at melda seg til venjaraútbúgvingina og at gera tað í seinasta lagi 15. august, send teldupost til hsf@hsf.fo, upplýs navn, tlf.nr., felag og teldupost. Luttøkukostnaður: 1000,- kr. *) Pláss er í mesta lagi fyri 20 luttakarum á hvørjum skeiði. Miðað verður ímóti, at feløgini í økinum fáa javna umboðan.

*) Viðv. kostnaði:
Fulli kostnaðurin fyri hvønn luttakara er um 2000,- kr. og umfatar tveir skeiðsdagar frá uml. kl. 9 á morgni til kl. 18 á kvøldi at taka Grundskeið 1 og 2 – umframt tvey kvøldskeið frá uml. kl. 18-21 at taka Valskeið 1 og 2. At eggja fólki at fara undir útbúgvingina, hevur HSF gjørt av at rinda helvtina av kostnaðinum hjá hvørjum luttakara. Eftir eru so 1.000, – kr, sum luttakarin – ella felagið má gjalda.

Tórshavn 14. mai 2013

Starvsnevnd HSF’s

25. og 26. apríl skipaði HSF – saman við IHF – fyri venjaraskeiði. Um 40 fólk úr flestu hondbóltsfeløgum kring landið tóku lut. Skeiðsleiðari var týskarin Helmuth Martin, sum hevur til uppgávu, vegna IHF, at ferðast til ymisk lond at halda skeið. Innihaldið í skeiðinum fevndi frá tí mest grundleggjandi, nevniliga kasti- og loftiteknikki til koordinatiónsvenjingar, hondbóltsástøði – í mun til praksis, spæl 1:1 og málmansvenjing. Eisini varð komið inn á teknikk, taktikk og spæliskipanir, ymiskir verjuhættir og “power” hondbólt. Eitt, sum skeiðsluttakararnir dámdu sera væl, vóru tey mongu venjingarspølini, sum Helmut Martin alsamt kom fram við og sum riggaðu sera væl. 

Seinna skeiðsdagin vóru luttakararnir býttir í bólkar. Hvør bólkur fekk til uppgávu at gera eina bundna venjingargongd, sum so varð roynd í verki framman fyri øllum hinum. Bólkarnir fingu so viðmerkingar frá skeiðsleiðaranum og eisini frá hinum luttakarunum. Við skeiðsenda fingu luttakararnir prógv.  

Samanumtikið má sigast, at hetta samstarvið við IHF eydnaðist sera væl. Fyrsta skeiðsdagin luttóku 30 lærarar og námsfrøðingar og leggja vit tað saman við teimum 40 venjarunum, koma vit upp á 70 fólk. Harumframt vóru einir 75 ungir hondbóltsspælarar partur av skeiðinum sum statistar. Og hesi ungu fingu eisini væl burtur úr, tey fingu høvi at uppliva nakrar øðrvísi venjingar, sum tey fara at minnast leingi.

[Show as slideshow]

[View with PicLens]

12►

24. apríl var ein serligur dagur í Høllini á Hálsi, tí tá høvdu nevniliga 14 lærarar og 19 námsfrøðingar sett dagin av til at læra um hondbólt. Og endamálið við tí var at fáa vitan og “amboð” til at nýta í gerandisdegnum  - at fáa børn at røra seg meira. Og til tað er hondbóltur vælegnaður, tí tað er ein ítróttargrein, har allur kroppurin verður nýttur. Skeiðið byrjaði kl. 09 og skeiðsleiðari var týski Helmut Martin, sum var komin til Føroya sum partur av eini menningarætlan hjá altjóða hondbóltsfelagsskapinum IHF, har endamálið er at geva hondbóltinum gróðralíkindi í skúlum og dagsstovnum. Byrjað var við at læra um, hvussu armurin skal førast, tá ið kastað verður, nevniliga at albogin skal upp um oyrað og hondin so høgt upp sum til ber. Hetta var víst við at luttakararnir skuldu kasta pappírsflúgvarar, sí myndina. Fram til kl.16 henda dag var ferð á – tað vísti seg, at skeiðsluttakararnir sera fegnir vildu luttaka í venjingunum og spølunum, sum Helmut Martin skipaði fyri – og tey vóru sera væl dámd.  Tá skeiðið var liðugt, fingu luttakararnir prógv og nakrar serligar bóltar, sum eru vælegnaðir til byrjunarhondbólt. Samanumtikið má tað sigast vera sera positivt at skúlar og dagsstovnar lata starvsfólk taka lut í einum slíkum skeiði.

[Show as slideshow]

[View with PicLens]

Brennir tú fyri hondbólti, avbjóðingum og góðum lívsløtum, tá ert tú møguliga nýggjur høvuðsungdómsvenjari í H71. Les lýsingina her:  Her

Limafundur var í HSF mánakvøldi 22. april 2013. Á fundinum vóur 21 fólk úr 7 feløgum møtt og hesi evni vóru viðgjørd hesi evni viðgjørd: 1. Álmanakki, 2. Hvat vilja vit við føroyskum hondbólti?, 3. Dagføring av kappingarreglunum, 4. Fyrispurningur frá “Í menniskjum góður tokki”. Les fundarfrágreiðingina her